Ҫĕнтерӳ кунĕн уявне Раҫҫей халăхĕ кашни ҫулах пысăка хурса уявлать. Тăван ҫĕршывăн ирĕклĕхĕшĕн ҫапăҫнă салтаксене, тыл ветеранĕсене пуҫ таятпăр. Кăҫал фашизма ҫĕнтерни 71 ҫул ҫитрĕ. Ҫултан ҫул Ҫĕнтерӳ кунĕн пĕлтерĕшĕ ӳссех пырать. Пирĕн халăх ҫак уявăн пĕлтерĕшне пысăка хурать.

Майăн 8-мĕшĕнче Хапăс ялĕн Культура керменĕ умне Ҫĕнтерӳ кунне чыслама ял халăхĕ, учительсемпе шкул ачисем пухăнчĕҫ. Шел пулин те, Тăван ҫĕршывăн аслă вăрҫи ветеранĕсен йышĕ кашни ҫулах пĕчĕкленсе пырать. Хапăс ялĕнче вăрҫă ветеранĕ пĕрре ҫеҫ юлнă, вăл Кондукторов Иван Федорович. Вăл та паян ял халăхĕпе пĕрле ҫак ҫутă куна уявлать.

Уява Хапăсри вăтам шкул директорĕ Оксана Владимировна Жебелевскаяпа Упнер ял поселенийĕн пуҫлăхĕ Иван Васильевич Афанасьев уҫрĕҫ. Салам сăмахĕсене калама Вăрнар районĕн вĕренӳ пайĕн пуҫлăхĕн ҫумĕ Инна Григорьевна Егорова ҫитнĕ. Шкул ачисен парадне физкультура учителĕ Дмитрий Владимирович Герасимов ертсе пычĕ. Парад вали кашни класăн хăйĕн форми пур.

Шкул ачисем кăҫăлхи уяв парачĕ вали Вилĕмсĕр полкăн гимне вĕреннĕ. Вĕренӳ отличникĕсене Хапăс шкулĕнче ĕҫленĕ ветеран учительсен портречĕсене йăтса утма хисеп тунă. 5 класра вĕренекенсем сăвăсем вуларĕҫ. Шкул ҫулне ҫитмен ачасем те айăккинче тăрса юлман. Вĕсем те Ҫĕнтерӳ кунĕ вали сăвăсем те, юрă та вĕреннĕ.  6 класра вĕренекен хĕрачасем вара «Журавли» юрăпа ташă хатĕрленĕ. Ку ташă пурин чунне те хускатрĕ.

Уяв вĕҫĕнче Культура керменĕ умĕнчи Паллă мар салтак палăкĕ умне чечексем хучĕҫ. Асăнмалăх фото ӳкерĕнчĕҫ.

Ветерансене, хисеплĕ хăнасене ял администрацийĕ уяв сĕтелĕ хушшине лартса хăналарĕ.