Хĕллехи сивĕ кунсем пуçланчĕç. Пит-куçа сивĕ чĕпĕтет. Хушăран асар-писер çил-тăман та пулкалать. Юрĕ те хулăн çуса лартрĕ. Хĕл каçакан вĕçен кайăксене апат тупса çиме хĕн. Вăрмантан вĕсем этем пурăнакан вырăнсем çывăхнерех куçрĕç. Эппин, вĕсене çак вăхăтра пирĕн пулăшу нихăçанхинчен те ытларах кирлĕ.

Тăваттăмĕш класра вĕренекенсем кашни çулах çунатлă тусĕсене пулăшаççĕ. Акă кăçалхи вĕренÿ çулĕнче каллех сырăшсем ăсталарĕç. Вĕсене шкул картишĕнчи йывăç тата тĕмĕ турачĕсем çине çакрĕç. Сырăша вĕçен кайăксем юратакан апата сапрĕç те аяккарах кайса тăчĕç. Сăнаççĕ. Кайăксем пĕрин хыççăн тепри ун ăшне чăмаççĕ. Хăйсен чĕлхипе тем чакăлтатаççĕ. Ырă çимĕçшĕн кайăк тусĕсене мухтаççĕ пулас.